Breheimen nasjonalpark
Variasjonen er stor i Breheimen, som omfattar frodige stølsdalar, karrig høgfjell og isbrear. Nasjonalparken spenner frå over 2000 moh. nesten heilt ned til fjorden. Her finn du nokre av dei mest nedbørsfattige og -rike områda i landet. Det er eit variert planteliv knytt til høgfjellsmiljø, rasmarker, gammal furuskog, kalkrik bjørkeskog, rik og gammal edellauvskog, fossrøyksoner og breelvdelta.
Hyttenettet til DNT omfattar også Breheimen, og det er 10 hytter knytte til DNT-rutene i nasjonalparken. Frå Jostedalen kan du ta fleire populære turar i Breheimen, som for eksempel Vangsen, Myrhyrna og Spørteggbreen, sjå UT.
Jostedalsbreen nasjonalpark
Jostedalsbreområdet er eit av dei største områda vi har att i Sør-Noreg med samanhengande urørd natur. Derfor har området stor nasjonal verdi, både for naturvern og friluftsliv. Store høgdeskilnader og variasjonar i lokalklima og påverknad frå breane har resultert i ei enorm spennvidde i naturtypar.
Jostedalsbreen er den største isbreen i fastlands-Noreg og -Europa, og breen har ei samanhengande lengd på vel seks mil. Jostedalsbreen nasjonalpark blei verna i 1991 og har eit areal på 1314 km². Om lag halvparten av nasjonalparken er bredekt. Nasjonalparken ligg i kommunane Luster, Stryn, Sunnfjord, Gloppen og Sogndal. Jostedalsbreen er ein platåbre som sender heile 28 brearmar ut over kanten. Desse brearmane strekkjer seg frå om lag 300 til 2000 moh.
Jostedalsbreen nasjonalpark har mange populære turområde, særleg med fokus på bre-og fjellsport. Her har det vore lang tradisjon for brevandring og skiturar. Populære turar er brevandring på Nigardsbreen, vårskituren «Josten på langs» og brekryssingar mellom Jostedalen og Nordfjord.
